top of page

Domaine San Martinu : quandu u prugettu piglia forma

Nov 6
5 min read

In Rapale, in Nebbiu, u Domaine San Martinu lascia à pocu à pocu i piani è i disegni per diventà un locu veru. À qualchì mese da l’apertura prevista d’aprile 2027, i muri s’alzanu, i spazii piglianu forma è u spiritu di u Domaine principia à palesassi.



Qualchì mese fà, San Martinu era sempre, prima di tuttu, piani, disegni è imaginazione.

Ci vulia à fighjà un terrenu, qualchì linea nant’à un screnu è i disegni di l’architettu per imaginà ciò chì, un ghjornu, averia da nasce quì.

Oghje, tuttu hè cambiatu.

I muri sò quì. I spazii piglianu forma. L’aperture inquadranu digià u paisaghju. È, marchjendu oghje à mezu à u cantieru, pudemu per a prima volta imaginà veramente a vita chì ci serà dumane trà sti muri.

San Martinu piglia forma.


Un prugettu chì duvia appartene à u so paisaghju

Dapoi u principiu, aviamu una cunvinzione : ùn vuliamu micca custruisce quì un locu chì si puderia truvà in altrò.

San Martinu duvia appartene à Rapale, à u Nebbiu è à a Corsica ch’è no tenimu cara.

U terrenu, a so vegetazione, a petra, a luce, e muntagne in luntananza, i culori chì cambianu longu à a ghjurnata… tuttu què ùn duvia micca esse solu u decoru di u Domaine.

Ne duvia fà parte.

Hè st’idea chì hà guidatu e prime scelte architetturale : invece d’un solu bastimentu grande è impunente, San Martinu hè statu imaginatu cum’è un inseme di volumi, ligati trà di elli da passaghji, cammini è spazii aperti.

Un’architettura chì seguita u terrenu invece di vulè impone si à ellu.


Quandu e linee d’un disegnu diventanu muri

Un cantieru hà qualcosa di particulare.

Durante un bellu pezzu, ci vole assai imaginazione.

Po vene un mumentu induve tuttu diventa più cuncretu.

Un muru disegna una camera. Un’apertura diventa una finestra. Un passaghju palesa d’un colpu una perspettiva chì, sin’à tandu, ùn esistia chè nant’à un pianu.

È certe viste ch’è no aviamu imaginate cumpariscenu esattamente induve duvianu esse.

Hè forse unu di i mumenti i più passiunanti di u prugettu.

Perchè daretu à u cimentu, à a petra, à l’impalcature è à e macchine di u cantieru, cuminciamu digià à vede qualcosa d’altru.

Cuminciamu à vede San Martinu.



Fà entre u paisaghju à l’internu

Quandu si hà a furtuna d’esse in un ambiente cum’è quellu di u Nebbiu, forse chì u più difficiule hè di sapè lascià a piazza à u paisaghju.

Avemu dunque circatu à creà u più pussibule di leia trà l’internu è u fora.

Aperture chì inquadranu u paisaghju. Terrazze chì allarganu i spazii di vita. Passaghji induve circulanu l’aria è a luce. Spazii à l’apertu chì ùn sianu micca solu aghjunti à i bastimenti, ma chì fessinu veramente parte di a manera di campà u Domaine.

A vegetazione averà anch’ella una piazza essenziale.

Accumpagnerà l’architettura, ripigliendu e spezie è i culori di u paisaghju mediterraneu è, cù u tempu, aiuterà i bastimenti à mischjà si ancu di più cù u so ambiente.

U nostru scopu ùn hè micca chì, ghjunti à San Martinu, si pensi prima di tuttu à l’architettura.

Ci piacerebbe piuttostu ch’ellu firmessi in memoria una luce, un prufume, una vista, un mumentu di silenziu o simpliciamente a sensazione di stà bè.



Daretu à i muri, imaginemu digià e prime matinate

Hè forse quì chì u nostru sguardu nant’à u cantieru hè cambiatu u più sti pochi mesi.

Ùn vedimu più solu camere è spazii.

Cuminciamu à imaginà mumenti.

Un primu caffè fora a mane.

Una finestra aperta nant’à una ghjurnata chì principia.

U ritornu da a marina à a fine di u dopu meziornu.

Qualchì ora passata à ùn fà nunda.

Un bichjeru mentre a luce cala pianu pianu nant’à e muntagne.

Una cena chì dura un pocu di più chè previstu.

È po quellu lussu diventatu oghje cusì raru : avè u tempu.

San Martinu hè pensatu cum’è una residenza cù servizii alberghieri, ma daretu à sta definizione ci hè un’ambizione assai più simplice : creà un locu induve ognunu si possi sente liberu, puru ritruvendu l’attenzione è i servizii ch’ellu aspetta d’un sughjornu in albergu.


A Corsica à dui passi… è a tranquillità à u ritornu

In u nostru primu articulu, vi purtavamu à scopre i paesi di u Nebbiu è tuttu ciò ch’ellu serà pussibule di fà intornu à u Domaine.

È hè ghjustamente unu di i piacè ch’è no imaginemu per San Martinu.

Parte a mane versu San Fiurenzu. Piglià a strada di l’Agriate. Scopre un paese. Firmà ind’è un pruduttore. Pranzà in qualchì locu senza avè lu veramente previstu.

È po vultà.

Ritruvà Rapale, a tranquillità è u Domaine.

Ci piace l’idea chì San Martinu possi esse à tempu un puntu di partenza per scopre l’Alta Corsica è un locu induve, certe volte, si hà simpliciamente a voglia di stà.



Un prugettu custruitu inseme

San Martinu ùn hè, ben intesu, a storia d’una sola persona.

Dapoi i primi schizzi, architetti, imprese, artigiani è partenarii portanu ognunu una parte di u so sapè fà à u prugettu.

Certi scontri anu influenzatu San Martinu assai di più di ciò ch’è no aviamu pussutu imaginà à u principiu.

Hè in particulare u casu di u nostru scontru cù Joseph è a squadra di Studio Battistelli Architecture.

Joseph hè architettu, ma hè dinù figliolu di Rapale. A so cunniscenza prufonda di u locu è a so manera di fighjà u paisaghju anu subitu rispostu à ciò ch’è no vuliamu creà.

A petra. A vegetazione. A luce.

Elementi simplici chì sò diventati, à pocu à pocu, u filu cunduttore di u prugettu.

Hè dinù per quessa ch’è no avemu principiatu à cuntà nant’à e nostre rete suciale a storia di « Quelli chì facenu San Martinu ».

Perchè un locu cum’è questu nasce dinù grazia à e donne è à l’omi chì participanu à dà li vita.



È avà ?

Ferma sempre assai da fà.

Durante i mesi à vene, u cantieru cambierà torna d’aspettu. I spazii si chjuderanu, i materiali cumparisceranu, a vegetazione piglierà a so piazza, po veneranu i mobuli, e camere è tutti quelli ditagli chì, presi unu à unu, ponu parè insignificanti ma chì, inseme, daranu à u Domaine a so persunalità.

Continueremu à sparte cun voi ste tappe.

Micca solu per mustrà l’avanzata di i travagli, ma perchè ci pare interessante di cuntà cumu nasce un locu ancu prima ch’elle s’aprinu e so porte.

È po venerà u mumentu induve e macchine lasciaranu u Domaine.

Induve l’ultimi arnesi seranu messi da cantu.

Induve, per a prima volta, San Martinu ùn serà più un cantieru.

Ma un locu prontu à accoglie vi.



À truvacci d’aprile 2027.

 
 
 

Comments


bottom of page